Besseggen - Nasjonal turiststi i Vågå

Turen over Besseggen går mellom Gjendesheim og Memurubu og byr på ei særprega naturoppleving i hjartet av Jotunheimen. Utsikta mot det grøne Gjende og det blå Bessvatnet er kanskje det mest kjende synet frå turen. Dei mange besøkande gjer samtidig at det er viktig å ta godt vare på både stien, naturen og opplevinga.

Kva betyr det å vere Nasjonal turiststi?

Nasjonale turiststiar er eit utval av turstiar og turmål med stor attraksjonskraft og svært mange besøkande. Besseggen er ein av sju autoriserte nasjonale turiststiar i Noreg. Målet med ordninga er å ta vare på natur- og opplevingsverdiane, leggje til rette for trygg ferdsel og bidra til lokal verdiskaping.

Besseggen skal vere ei god oppleving – også i framtida

Statusen som Nasjonal turiststi inneber eit langsiktig arbeid med besøksforvaltning. For Besseggen handlar det mellom anna om å redusere slitasje, ta vare på naturverdiane og arbeide med informasjon og tryggleik. Tilrettelegginga skal ikkje vere større enn nødvendig, og omsynet til naturen, friluftslivet og lokalsamfunnet skal stå sentralt.

Besseggen er ein viktig del av Vågå og Jotunheimen, både som turmål og som naturoppleving. Gjennom god og langsiktig forvaltning er målet at også framtidige generasjonar skal kunne oppleve Besseggen og det særprega fjellandskapet rundt.