Skatt, avgifter og gebyr

Kommunale avgifter og gebyr i Vågå kommune blir fakturert 12 gonger i året. Du kan betale fakturaen med eFaktura eller AvtaleGiro.

Ynskjer du papirfaktura, kjem det eit tilleggsgebyr på (per i dag) 50 kroner.

Vågå kommune har eigedomsskatt på bustader, fritidsbustader og næringseigedomar. 

Kommunen nyttar bustadverdiar frå Skatteetaten ved utskriving av eigedomsskatt på bustader der slik verdi er berekna, jf. eigedomsskattelova § 8 C-1.

Alle bustader, gardsbruk og fritidseigedomar får ein obligatorisk reduksjon i taksten på 30 prosent.

Eigedomsskatten blir skriven ut i 12 terminar saman med andre kommunale avgifter.

Kommunen fastset kvart år gebyr for kommunale tenester. For fleire av desse tenestene skal gebyret berre dekke kommunens kostnader ved å tilby tenesta.

Kva betyr sjølvkost?

• Kommunen skal berre få dekka utgiftene sine for å produsere tenesta.
• Kommunen har ikkje lov til å tene pengar på tenesta over tid.
• Gebyret blir rekna ut frå alle kostnader knytt til tenesta, minus andre inntekter enn gebyr.

Det betyr ikkje at kommunen ikkje kan få overskot eitt år. Budsjett og faktiske kostnader kan variere.

• Overskot blir sett av på eit sjølvkostfond for tenesta.
• Underskot blir dekka frå same fond.
• Dette sørgjer for at kommunen ikkje tener pengar over tid på sjølvkosttenestene.

Vi oppfordrar innbyggjarar som vil, til å sjå på kalkylar og rekneskap, som blir publisert i kommunens årsrapport kvart år.

I budsjettet set kommunen gebyra slik at dei dekker forventa kostnader framover, samtidig som sjølvkostfondet blir brukt i tråd med reglane.

Følgjande sjølvkosttenester er meirverdiavgiftspliktige:

• Vassforsyning
• Avlaupshandtering
• Renovasjon
• Slamtømming