"Kå keinn e gjera"

Vågå kommune tek grep for klima og energi. Dei globale klimautfordringane kan verke store, men også små handlingar i kvardagen har betydning. Med kampanjen «Kå keinn e gjera?» ønskjer kommunen å vise korleis kvar og ein kan bidra.

Målet er å auke kunnskapen om klima og energi, både blant innbyggarar og tilreisande, og gjere det enklare å ta miljøvenlege val – heime, på jobb og i fritida.

Ein levande klimaplan

Vågå kommune har vedteke ein klima-, energi- og miljøplan for å ta vare på naturen, redusere utslepp og styrke lokalsamfunnet for framtida.

For at planen skal ha effekt, må han vere i bruk – ikkje berre liggje i ei skuff.

Difor blir planen gjort levande gjennom korte filmar som viser konkrete tiltak frå tiltaksdelen, og korleis dei kan gjennomførast i praksis – både av enkeltpersonar, verksemder og lokalsamfunn. 

Om filmserien

Filmserien «Kå keinn e gjera?» viser:

• kva kvar enkelt kan bidra med
• enkle og konkrete tiltak
• døme frå kvardagen i Vågå

Her møter du både barnehagar, skular, næringsliv, frivillige og privatpersonar som viser korleis små grep kan utgjere ein forskjell.

Målet er å gjere planen:

• lett å forstå
• enkel å ta i bruk
• engasjerande for alle

Matavfall – frå søppel til ressurs

I den første filmen møter vi Marit Svanborg, ny dagleg leiar i NGR.

Visste du at matavfall ikkje er søppel, men ein ressurs? I Vågå blir matavfall no sortert i alle hushaldningar. Restar som bananskal, kaffigrut og grønsaker kan bli til biogass og kompostjord.

Kå keinn e gjera - med restane frå i går?

Anna og Idunn viser kor enkelt det er å bruke restemat. Med grønsaker som begynner å bli slappe, egg, skinke og restar frå middagen, lagar dei ein enkel og god rett.

Matsvinn er ei stor utfordring, men mykje kan gjerast heime på kjøkkenet.

Kå keinn e gjera - for å redusere matsvinn?

I Lalm barnehage viser barna korleis dei handterer matavfall: dei komposterer det.

Kompostering er ein enkel og miljøvenleg måte å redusere matsvinn på, og her ser vi at alle kan bidra – også dei minste.

Kampanjen er finansiert av Innlandet Fylkeskommune.