Gjennom praksis får deltakarane tilgang til det norske arbeidslivet og norsk språk, og får vist fram og auka kompetansen sin. Praksis kan også brukast for å styrke grunnleggande ferdigheiter, og for å kartlegge kompetanse og vidare kvalifiseringsbehov.
Praksis skal støtte opp under dei langsiktige måla i integreringsplanen til den enkelte deltakar. Føremålet og den individuelle tilpassinga skal avgjere lengde, innhald og metode i praksisen. Deltakarane har ulike forutsetningar, og har ulike opplæringsbehov undervegs i kvalifiseringsløpet. Føremålet kan derfor vere forskjellig for ulike deltakarar.
Eksempel på ulike føremål med praksis er:
- å praktisere norsk i autentiske situasjonar kobla saman med norskopplæringa på vaksenopplæringssenteret
- å koble teoretisk kunnskap og praksis innanfor eit yrke/fag
- å styrke grunnleggande ferdigheiter
- å få kartlagt kompetanse og arbeidsevner, og vidare kvalifiserings- og tilretteleggingsbehov
- å vise fram sin kompetanse for ein arbeidsgjevar og få ordinær jobb
- å vidareutvikle sine norskferdigheiter og annan kompetanse opp til eit gitt nivå for å bli tilsett hjå ein aktuell arbeidsgjevar
- å få arbeidserfaring og ei referanse
- å styrke nettverket sitt
- å tilegne seg kunnskap om normer og reglar i arbeidslivet, og norsk arbeidslivskultur
Det å ta i mot ein flyktning i praksis, kan vere lønsamt på fleire måtar. Ved å ta i mot ein praksiskandidat, kan du som arbeidsgjevar bidra positivt til integrering, samtidig som du får moglegheita til å bli kjent med ein ny potensiell framtidig medarbeidar.
Fordelar med ordninga:
- Ingen direkte lønskostnader. Praksiskandidaten får introduksjonsstønad av kommunen i praksisperioden.
- Ein ny, potensiell framtidig tilsett. Ein praksiskandidat skal få erfaring frå arbeidslivet. Målet for dei fleste flyktningar er å kome i fast jobb.
- Du bidrar positivt til integrering og folketal. Forsking viser at arbeid er den viktigaste “bli-faktoren”. Som arbeidsgjevar kan du bidra til at flyktningar trivst og blir verande her.
- Du får oppfølging frå flyktningtenesta. Vi er tett på med tanke på oppfølging, og gjer så godt vi kan for å finne “rett kandidat til rett praksisplass”.
- Nye perspektiv og mangfald. Å anerkjenne og omfavne mangfald i ein organisasjon kan vere ei styrke og gje verksemda ein konkurransefordel på fleire område.
- Ta kontakt med Flyktningtenesta om du har moglegheit til å ta inn ein kandidat i praksis.