Morten Krogvold - workshops i Vågå
Norges kan hende mest kjende fotograf, Morten Krogvold, har etter kvart ei lang fartstid i Vågå. Her har han funne base for sine fotografiske workshops, som gjer deg til ein meir reflektert fotograf, men like viktig - eit meir reflektert menneske.
MORTEN KROGVOLD er fødd i Oslo i 1950 og er lektor i fotografi. Han har delteke på ei rekkje kollektivutstillingar i inn- og utland, og har hatt mange separatutstillingar. I 1979 vart han som andre fotograf i Norge antatt på Haustutstillinga og har hatt bilde der i 1980, 1981 og 1983. Han har motteke Statens reise- og studiestipend i 1979 og 3-årig arbeidsstipend for kunstnarar i 1980. I 1989 fekk han Fotografiprisen. Denne vart utdelt for fyrste gong i samband med 150-årsjubileet for fotografiet. Morten Krogvold vart også tildelt Oslo bys Kulturpris 1996.
Det er over ti år sidan Morten Krogvold heldt sin fyrste workshop i fotografi i Vågå. Den gongen var tanken å halde fire kurs. I januar 2005 blei workshop nr. 100 avvikla og over 3000 menneske har til no delteke på MKW. Rykta om hans pedagogikk, entusiasme og evne til å formidle fotografi spreier seg og han har halde internasjonale workshops i fotografi i England, USA, Italia, Kina, Sør-Afrika, Irland, Hellas, Portugal, Tsjekkia samt i dei nordiske landa.
På ein kulturkveld i Vågå i januar 2005 vart han utnemnt til riddar av 1. klasse av Den Kongelige St. Olavs orden.
Samme kvelden vart han også tildelt kulturprisen i Vågå for 2004.
Sjå følgjande sider for meir informasjon:
www.mortenkrogvold.com
www.fotografiakademiet.no